व्यापार

व्यापार

विश्व सिग्देल

कमला आशाहरूलाई नरम ओठले सुसेल्छन् फूलहरू

ती फूलहरू रोप्ने, गोड्ने, फुलाउने

र बेच्ने यहाँ घाटामा छन्

धर्तीका मनोरम छटा

कुचिले दुरुस्तै उतार्ने

र हृदयमा अझै कोमल पुतली सपनाले भरिदिने

महान शिल्पी यहाँ घाटामा छन्

पहाडका कठोरतामा जीवनका

बाँचिरहुँ लाग्ने आशा उब्जाउने

पहराका छाती खोपेर संभावनाका राजमार्ग कोर्ने

दुःखलाई चट्टान मानी फोर्ने

महान कर्मी घाटामा छन्

सोझो बाटो बनाउने र सोझो बाटो हिँड्ने

दुवै यहाँ घाटामा छन्

संसारमा मानवता बाँढ्ने घाटामा छन्

संसारमा माया फैलाउने घाटामा छन्

सहयोग, सद्भाव, भाइचारा घाटामा छन्

यो शताब्दी

डोहोरिएको छ नाफाखोरको इसारामा

घाटालाई बेरेर धर्म, जाति, नश्लका आकर्षक प्याकेटमा

शताब्दी चतुर बनियाजस्तै बसेको छ बिच बजारमा

बजारको ग्राफ उकालो लाग्दै छ

हतियारको व्यापारी मुस्कुराउँदै छन्

अब घाटाको व्यापार कसले र किन गर्ने यहाँ ?

युद्धलाई आकर्षक प्याकेज बनाएर बेचिरहेछ्न् व्यापारीहरू

युद्ध मात्र अब त्यस्तो व्यापार भएको छ

जहाँ घाटाको गुन्जायस छैन ।

युद्ध अब घाटाको व्यापार रहेन !!